Idoia Asurmendi Garcia (Aramaio, 2000ko azaroaren 21a). Musikarekiko zaletasuna familia girotik datorkit eta betidanik bizi izan naiz abestiz inguratuta.8 urterekin Arrasateko Musika Eskolan pianoa ikasten hasi nintzen, eta Aramaioko Papargorri Abesbatzan abesteari ekin nion. Ordutik, hainbat abesbatzatan parte hartu izan dut; Donostiako Orfeoian edota Euskal Herriko Gazte Abesbatzan, besteak beste. Gasteizko Jesus Guridi Kontserbatorioan jarraitu nituen musika eta piano ikasketak eta, bitartean, bakarlari bezala hasi nintzen kontzertu txikiak ematen, baita zenbait proiektutan piano-jole gisa ere.
2019ko azaroan Kutxa Kultur Beka jaso nuen Donostian. Horren laguntzarekin, banda bat osatu nuen ordura arte sortutako abestiak bildu eta nire lehenengo diskoa grabatzeko: ilun eta abar. Oraindik abestirik argitaratu gabe, ahoz aho zabaldu zen nire izena eta hainbat plaza garrantzitsutan kontzertuak eman genituen; hala nola, Donostiako Jazzaldian, Chillida Leku Museoan eta Donostia Festibalean. 2021eko apirilean ilun eta abar albuma argitaratu zen, Maria Oses idazlearekin elkarlanean sortutako abestiak abiapuntutzat hartuta. 2022ko irailean lehenengo disko horren birari amaiera eman genion urte eta erdiko ibilbide luze baten ondoren. Izan ere, 60 kontzertu baino gehiago eman genituen Euskal Herri osoan zehar.
Nire bigarren diskoa, de amar y desandar, 2024ko martxoaren 22an kaleratzea mugarri garrantzitsua izan zen nire musika-ibilbidean. Proiektu horrek, ia urte eta erdiko geldialdiaren ondoren, bilakaera artistikoa eta agertokietara itzultzea markatzeaz gain, musikaren bidez nire bizitzako kapitulu intimo eta pertsonal bat ere kontatzen du. Disko honen sorkuntza auto-esplorazio eta adierazpen-prozesu sortzaile bat izan zen, non abesti bakoitza nire historiaren zati bihurtu zen. Hau ez da kantu-bilduma bat izatera mugatzen; entzumen-esperientzia oso bat izan nahi du, pista bakoitza narratiba zabalago baten osagai erabakigarria baita.
